Wanafunzi kuandamana kupinga kidongo chekundu kuwa maegesho

SAKATA la uwanja wa wazi wa kidongo chekundu kubadilishwa matumizi lachukua sura mpya baada ya wanafunzi wa Shule ya Sekondari ya Dar es Salaam na Shule ya Msingi Gerezani kupanga kuandamana ili kushinikiza kurudishiwa kiwanja hicho.

Miezi michache manispaa ya Ilala walioutupia lawama uongozi wa manispaa hiyo kwa kukigeuza kiwanja cha Kidongo Chekundu kuwa eneo la kuuzia magari.

Wakizungumza  baadhi ya wanafunzi wanaosoma katika shule hizo zilizoko jirani na kiwanja hicho, walidai kushangazwa na hatua iliyofikiwa na uongozi wa manispaa hiyo kuamua kukifanya kiwanja hicho kuwa sehemu ya kuuzia magari chakavu.

Mwanafunzi aliyejitambulisha kwa jina moja la Mussa, alisema kuwa wamechoshwa na ufisadi unaofanyika katika manispaa hiyo hivyo wanalazimika kuandaa maandamano yatakayoelekea katika ofisi ya mkuu wa mkoa ili kushinikiza kuondolewa kwa magari hayo.

Alisema kuwa kutokana na kukosa eneo la kufanyia mazoezi na huku baadhi ya wanafunzi wasichana wakidai kupata vishawishi vya kimapenzi kutoka kwa watu wanaokaa katika eneo hilo ni muhimu suala hilo likapata utatuzi.

“Tunataka kujua wanakusanya kiasi gani maana kama faida ipo ni muhimu ikagawanywa kwa shule zilizopo jirani kuliko faida kutumiwa na watu wachache ambao wamegeuza eneo hilo kuwa mradi wao,” alisema.

Naye Asha Aidy, alisema kuwa sasa hivi wanaogopa hata kupita eneo hilo kutokana na kuwepo kwa vitendo vya vishawishi vinavyotoka kwa watu wanaouza magari hayo.

Alisema kuwa manispaa hiyo ina maeneo mengi ya kuweka maduka ya magari chakavu na sio kukitumia kiwanja hicho ambacho ni mahususi kwa shughuli nyingi za kijamii.

Hata hivyo, gazeti hili lilijaribu kumtafuta diwani wa eneo hilo, Salum Bisarara (CCM), ili kupata kauli yake, ambapo alikiri kuwepo kwa maegesho ya magari lakini alitaka kuiuliza manispaa ndiyo yenye kujua ukweli.

Akizungumza kuhusu malalamiko hayo, ofisa mahusiano wa manispaa hiyo, Tabu Shaibu, alisema kuwa hana taarifa za kuwepo kwa maandamano hayo lakini alikiri uamuzi wa kuweka maegesho wa magari ulifikiwa na manispaa hiyo.

Alisema kuwa manispaa ilianza kukusanya mapato tangu Desemba mwaka jana kupitia maegesho hayo.