Kigogo wa ajira Polisi matatani afikishwa kwa JK, maofisa wengine watimuliwa

KAMISHNA Msaidizi Mwandamizi wa Polisi aliyekuwa anasimamia ajira katika jeshi hilo nchini, Renatus Chalamila amepewa likizo ya mwezi mmoja baada ya kutajwa mara nyingi kuhusika kuwatoza fedha vijana walioomba ajira za uaskari.

Wakati Chalamila akingoja uamuzi wa rais, maofisa wengine wanne wa jeshi hilo wamesimamishwa kazi na wanatarajia kufunguliwa mashtaka ya kijeshi kutokana na tuhuma mbalimbali za ukiukaji wa maadili na taratibu za jeshi hilo.

Kauli hiyo ilitolewa jana na Waziri wa Mambo ya Ndani ya Nchi, Dk. Emmanuel Nchimbi katika mkutano wake na waandishi wa habari jijini Dar es Salaam, akisema kuwa Chalamila amepewa likizo hiyo na mapendekezo kupelekwa kwa rais ili afanye maamuzi juu ya tuhuma zinazomkabili.

Alisema kufuatia hali hiyo, Jeshi la Polisi limelazimika kuwaondoa katika mafunzo askari wanafunzi 95 waliokuwa wamejiunga na chuo cha polisi baada ya kubainika kuwa walipata fursa hiyo kwa kutoa fedha.

Kuhusu tuhuma za maofisa wengine, Waziri Nchimbi aliwataja waliosimamishwa kuwa ni Elias Mwita aliyekuwa Mkuu wa Upelelezi Mkoa wa Mbeya, msaidizi wake Jacob Kiango na aliyekuwa mkuu wa kikosi cha kutuliza ghasia (FFU) wa mkoa huo, Charles Kinyongo.

Alisema kuwa maofisa hao walisimamishwa kazi tangu jana kutokana na kukiuka maadili ya jeshi hilo, wakituhumiwa kupeleka chumvi na sukari kwenye Ofisi ya Mkemia Mkuu badala ya kilo 1.9 ya dawa za kulevya aina ya cocaine zilizokamatwa na askari mkoani Mbeya, Machi mwaka jana.

Kwamba dawa hizo zilikamatwa katika kituo cha Tunduma kisha zikathibitishwa na maofisa wa Mamlaka ya Mapato (TRA) kuwa kweli ni mihadarati.

Waziri Nchimbi alisema vitendo hivyo vinavyofanywa na baadhi ya viongozi wa jeshi vinawavunja moyo na kuwapa hofu askari wa ngazi ya chini ambao hushindwa kufanya kazi zao kwa uadilifu unaotakiwa.

Katika hatua nyingine, aliyekuwa Mkuu wa Upelelezi mkoani Kagera, Peter Matagi amesimamishwa kazi na atafunguliwa mashtaka ya kijeshi kutokana na kukiuka taratibu za kazi kwa kuwabambikiza kesi zisizo na dhamana wananchi 13 wa Kata ya Nyakasimbi wilayani Karagwe.

Hatua hiyo ni kutokana na vurugu za kugombea ardhi ambazo hazikuwiana na aina ya mashtaka waliyoshtakiwa hali inayoonesha dalili ya uwepo wa rushwa.

Waziri Nchimbi alisema wananchi hao walibambikizwa kesi ya ujambazi wa kutumia silaha ambapo walikaa mahabusu kwa muda wa miezi miwili na baadaye timu ya uchunguzi iliyoongozwa na waziri mwenyewe iligundua kuwa mashtaka waliyoshtakiwa hayakuwa sahihi hali ambayo ilisababisha Mwendesha Mashtaka Mkuu wa Serikali (DPP) afute kesi.

Aliongeza kuwa serikali pia imemsimamisha kazi aliyekuwa Mkuu wa Polisi Wilaya ya Serengeti, Paul Mng’ong’o kwa kosa la kuingia katika hifadhi ya mbuga za wanyama ya Serengeti na kupanga njama ya kuchimba madini aina ya dhahabu hali iliyosababisha kushtakiwa kwenye mahakama ya kiraia.

Waziri Nchimbi alitoa wito kuwa serikali itawaunga mkono askari wanaofanya kazi kwa uadilifu ila watakaoenda kinyume na maadili na taratibu haitasita kuwachukulia hatua za kisheria ikiwemo kuwafukuza kazi.