Lundenga awashukuru wadau kusapoti urembo.

MKURUGENZI wa Kampuni ya Lino International Agency na mratibu wa shindano la urembo la Redd’s Miss Tanzania 2013, Hashim Lundenga, ameishukuru jamii kwa kuyaunga mkono mashindano hayo hali inayosababisha kuwa na ubora na kuliongezea heshima taifa.

                                                                             Hashim Lundenga

Lundenga alisema hayo jana jijini Dar es Salaam alipokutana na waandishi wa habari kuelezea mwelekeo wa shindano hilo ambalo kwa sasa lipo hatua ya vitongoji na wilaya ambayo yatakamilika mwishoni mwa Mei.

“Nichukue fursa hii kuwajulisha wadau wa sanaa ya urembo kuwa hatua ya ngazi ya vitongoji na wilaya yalishaanza kwa nchi nzima na tayari baadhi ya maeneo wameshamaliza na maeneo mengine yakitarajia kumaliza mwisho wa mwezi huu, tunashukuru kwa kuyapokea,” alisema Lundenga.

Alisema kutokana na mwamko huo, kutakuwa na mikoa 24 inayofanya mashindano; kanda 11, vyuo vya elimu ya juu 17, wilaya 18, huku vituo vya Mkoa wa Dar e Salaam vikiwa 11, vyote kwa pamoja vinafanya idadi ya vituo zaidi ya 80.

Kwa hatua hiyo, Lundenga alisema baada ya kumalizika kwa mashindano hayo ya awali, hatua ya kanda itafuata katikati ya Juni na kuingia katika hatua inayofuata.

Lundenga amewashukuru wazazi na walezi ambao wamewaruhusu watoto wao wasichana kujitokeza kwa wingi katika ushiriki wa shindano hilo.

Kwa upande wake Meneja wa kinywaji cha Redd’s Original, Victoria Kimaro, alisema kupitia kinywaji chao bora hapa nchini cha Redd’s, kimedhamiria kuwapo kwa ubora na kuendelea kutoa udhamini kwa ngazi zote.

Lundenga amewasihi wadau kuendelea kukiunga mkono kinywaji hicho ili kuweza kupata nguvu ya kuwaletea burudani.

Fainali hizo kwa leo zinatarajia pia kufanyika katika sehemu mbalimbali ikiwamo Redd’s Miss Moshi Mjini, Redd’s Miss Kibaha, Redd’s Chuo cha Ustawi wa Jamii, Redd’s Miss Ubungo na Redd’s Miss Mzizima.