Gharama za simu kuongezeka Julai

KUTOKANA na ongezeko la kodi katika huduma za simu za mkononi, gharama za huduma hizo zitaongezeka kuanzia Julai mosi mwaka huu.

Taarifa ya pamoja iliyotolewa jijini Dar es Salaam jana na Umoja wa wenye makampuni ya simu za mkononi Tanzania (MOAT) imesema pendekezo la serikali la kuweka kodi ya asilimia 14.5 kwenye huduma za simu za mkononi linalazimu kupanda kwa gharama.

MOAT imesema awali kodi ilikuwa ikitozwa asilimia 12.5 katika huduma ya mawasiliano ya simu na kwamba ongezeko la kufikia asilimia 14.5 tofauti na nchi za jirani Kenya na Uganda ambazo zimeendelea kutoza viwango vya ushuru vya asilimia 10 huku wakilalama asilimia 12.5, ni mzigo kwa watumiaji wa huduma zao.

“Muswada wa Sheria ya Fedha wa mwaka 2013 unaainisha kuwa huduma za mawasiliano ni huduma yoyote ya maelezo inayotolewa na makampuni ya mawasiliano ya simu kwa njia ya mawasiliano.

“Kwa kutoa au kupokea sauti, maandishi, picha au taarifa kupitia mfumo wa kielektroniki.” Ilieleza sehemu ya taarifa hiyo iliyosainiwa na Vodacom, Airtel, Tigo na Zantel.

MOAT ilieleza kuwa eneo mojawapo litakaloathirika ni huduma za intaneti ambalo linahitaji kuwekewa mikakati ya kulikuza kutokana na umuhimu wake katika maisha ya sasa kiuchumi na kijamii.

“Hatua hii ya kuongeza kodi itakwenda kinyume na mipango iliyopo yenye lengo la kuibadili jamii kwa kuipatia maarifa ya msingi kupitia huduma ya intaneti na mawasiliano ya simu,” taarifa ilisema.

Kwa mujibu wa MOAT, Tanzania ni kati ya nchi zenye kiwango cha chini ya matumizi ya huduma ya mtandao wa intaneti barani Afrika, ambapo watumiaji wa huduma hiyo ni asilimia 10, ikilinganishwa na Kenya yenye watumiaji asilimia 40.

“Hivi sasa, upanuzi wa mawasiliano na miundombinu vijijini ndiyo kipaumbele cha sekta nzima. Tunaamini hapa ndipo ukuaji wa sekta ya mawasiliano ya simu itakapoonekana katika miaka ijayo,” ilifafanua taarifa hiyo.