Jela miaka 25 kwa kumuuza mtoto wake.

MWANAKIJIJI wa Ihanda, John Mjwanga (36), amehukumiwa kifungo cha miaka 25 jela kwa kosa la kumuuza mtoto wake wa kiume wa miaka 10 kwa sh milioni 1.1 ili akachunwe ngozi.

Hukumu hiyo ilitolewa juzi na Mahakama ya Wilaya ya Kyela, mkoani Mbeya na Hakimu Mkazi Mfawidhi, Joseph Luambano, aliyedai kuridhishwa na ushahidi uliotolewa na upande wa Jamhuri.

Mbele ya hakimu huyo, Mwendesha Mashitaka, Nicholaus Tiba, alidai kwamba Novemba 17 mwaka 2010 mtuhumiwa huyo alikwenda Kasumulu kwenye mpaka wa Wilaya ya Kyela na Mbozi kutafuta wateja wa ngozi ya binadamu.

Ilidaiwa kwamba akiwa huko mtuhumiwa alikutana na Israel Edgar ambaye ni mfanyabiashara wa kuuza na kununua fedha za kigeni, hivyo walikubaliana.

Mwendesha Mashitaka, Tiba, alidai kwamba baada ya makubaliano mfanyabiashara huyo alitoa taarafa kituo cha polisi ambapo mkuu wa upelelezi alifika eneo hilo akijifanya mteja.

Kwa mujibu wa mwendesha mashitaka huyo, mtuhumiwa bila kujua alikubaliana bei na mkuu wa upelelezi kisha alikwenda kumchukua mtoto wake na kurejea kesho yake.

Ushahidi uliotolewa mahakamani ulidai kwamba mtuhumiwa alimchukua mtoto wake akimdanganya kuwa anampeleka kwa shangazi yake ili akasome ndipo alipompigia simu mkuu wa upelelezi aandae malipo.

Ushahidi huo ambao haukutiliwa shaka na mahakama, uliendelea kudai kwamba walikubaliana wakutane Kasumulu Motel, eneo ambalo askari polisi waliweka mtego uliofanikisha kukamatwa kwa mtuhumiwa huyo ambaye alikabidhiwa sh 200,000 na kukamatwa.