Makamba kumtoa Miss Tanga leo

NAIBU Waziri wa Sayansi na Teknolojia, January Makamba, leo anatarajia kuwa mgeni rasmi katika shindano la kumsaka malkia wa Redd’s Miss Tanga, linalotimua vumbi katika Uwanja wa Mkwakwani mkoani hapa.

Akizungumza na waandishi wa habari jijini hapa jana, Mkurugenzi wa DATK Entertainment inayoandaa kinyang’anyiro hicho, Asha Kigundula, alisema maandalizi yamekamilika, kilichosalia ni muda kufika na mrembo kuwekwa hadharani.

Kwa mujibu wa Kigundula, Redd’s, Miss Tanga, inadhaminiwa na L Hayat Investment Limited, Dodoma Wine, CXC Africa, Executive Solutions, Busta General Supply, Mkwabi Enterprises, Lusindic Investment LTD na Lavida Pub.

Wadhamini wengine wa kinyang’anyiro hicho ni pamoja na Jambo Leo, Staa Spoti, Five Brothers, Clouds Media, pamoja na magazeti tando (blogs) za Michuzi Media Group, Bongostaz.com, Saluti5, Kajuna, JaneJohn, Kidevu na assengaoscar.blogspot.com.

“Nashukuru Mungu mambo yameenda sawa, kilichokuwa kimebaki ni kumtangaza mgeni rasmi na tumeshampata tayari, ambaye ni Mbunge wa Bumbuli, Mheshimiwa Makamba. Tuzidi kuomba Mungu atuongoze katika mchakato mzima kesho ili mambo yaende sawa,” alisema Kigundula.

Aidha, Kigundula alisema DATK imeamua kutoa zawadi ya fedha taslimu kwa washindi na si vitu, ili warembo wake waweze kupata fursa ya kujiamulia manunuzi wao wenyewe kuliko kununuliwa, ambapo alisema mshindi wa kwanza atajishindia shilingi 500,000, wa pili 300,000 na wa tatu 250,000.

Mshindi wa nne na tano watapata shilingi 200,000 kila mmoja na warembo wengine watakaosalia watapata kifuta jasho cha shilingi 100,000 kila mmoja, huku akifichua uwapo wa zawadi maalumu kwa mrembo mwenye nidhamu ili kuliboresha shindano hilo.

Kigundula alisema, kwa upande wa burudani, msanii wa kizazi kipya, Khaleed Tunda ‘Tunda Man,’ ataongoza safu ya burudani, ambayo itakuwa na wasanii mbalimbali wakiwamo Dk. John, Nabisha kutoka kundi la THT, Fady Dady na wasanii chipukizi kutoka mkoani hapa.

Kigundula alisema shindano hilo linatarajiwa kuanza majira ya saa mbili usiku na kushirikisha warembo 12 ambao watachuana ili kuweza kumpata malkia wa mkoa huu ambaye atauwakilisha katika mashindano hayo ngazi ya Kanda kuelekea Redd’s Miss Tanzania.

Warembo hao ni Hawa Ramadhani (18), Hazina Mbaga (19), Like Abdulraman (19), Irene Thomas (20), Tatu Athumani (19), Winfrida Gutram (21), Lulu Mbonela (19), Hazina Daniel (19), Lulu Matawalo (22), Judithi Moleli (21), Neema Jonas na Hawa Twaybu (21).

Aliongeza kuwataka wakazi wa Tanga na mikoa ya jirani kujitokeza kwa wingi kushuhudia shindano hilo la aina yake ambalo litajenga historia mpya kwa mkoa huu.