‘Video nyimbo za injili zibebe taswira ya imani’

VIDEO za nyimbo za Injili za kwaya za madhehebu ya dini hapa nchini, zinapaswa kubeba taswira halisi ya imani na matendo ya Kikristo, badala ya matukio ya burudani, starehe na kuiga mifumo ya Kimagharibi.

Hayo yalisemwa na Tully Msyani, aliyekuwa mgeni rasmi katika uzinduzi wa harambee ya kuchangia gharama za kutayarisha filamu ya uinjilishaji iliyoandaliwa na kwaya ya vijana wa Kanisa la Wasabato, Mbeya Mjini.

Msyani alisema kuwa nyimbo za Injili zimekuwa zikiwavutia watu wengi hasa waumini, lakini anashtushwa na namna zinavyoandaliwa, kutumia gharama kubwa na watu kusafiri kwenda mbali, wakati kile kinachokusudiwa kuonekana hakiendani na ujumbe wa nyimbo zinazoimbwa.

Alisema kuwa ipo haja vijana wa kanisa hilo wakabadili mfumo wao wa kutengeneza video zao kwa kukwepa gharama na maeneo yasiyokuwa muhimu katika utengenezaji wake, ili kazi zao ziweze kuuzwa kwa bei nafuu na watu wengi waweze kumudu kununua.

“Tumekuwa na tabia ya kuigana sana, lazima kazi zenu ziwe ‘unique’. Huwezi kuimba wimbo wa mateso ya Yesu huku video inaonyesha majengo ya ghorofa ya Arusha au mpo barabarani huku magari ya kifahari yakipita, sidhani kama watu wanajua wanachotakiwa kukifanya,” alisema Msyani.

Alisema kuwa nyimbo za injili zinapaswa kuwagusa na kuwabadilisha watu wanaozisikiliza ili waendane na matendo mema badala ya kuwafanya wengi wacheze na kuzifurahia bila kusikiliza ujumbe uliopo, na kwamba sehemu kubwa inapaswa kuwa ya kuwajenga watu kiimani.

Aidha, Mchungaji wa Kanisa la Wasabato Mbeya Mjini, Steven Ngusa aliwapongeza vijana wa kanisa hilo kwa kuwa wabunifu na kwamba kiasi cha zaidi ya sh milioni 10 wanazohitaji kwa ajili ya kuandaa filamu yao zitachangwa na waumini wote wenye mioyo safi.

Mwenyekiti wa Vijana wa Kanisa hilo, Nyanswi Mwita alisema kiasi cha sh milioni 4.7 kilitolewa na waumini wa kanisa hilo na wageni mbalimbali walioalikwa ili kuweza kuchangia fedha za kutengeneza video hiyo, huku akiahidi kutekeleza ushauri uliotolewa na mgeni rasmi.