JK: Tutapambana na wachochezi wa gesi.

RAIS Jakaya Kikwete amesema uchochezi wa baadhi ya wanasiasa kuhusiana na gesi asilia iliyogunduliwa nchini ni changamoto kwa serikali yake ambayo iko tayari kupambana nayo.

Kwa mujibu wa taarifa iliyotolewa jana jijini Dar es Salaam kwa vyombo vya habari na 

Kurugenzi ya Mawasiliano ya Rais, Ikulu, Rais Kikwete alitoa msimamo huo mwishoni mwa wiki iliyopita wakati alipokutana na kufanya mazungumzo na Mtendaji Mkuu wa kundi la kampuni za British Gas (BG) Chris Finlayson, moja ya kampuni zilizogundua gesi na kuanza kuwekeza katika uchimbaji wa rasilimali hiyo.

Katika mazungumzo hayo yaliyofanyika Ikulu, Dar es Salaam, Rais Kikwete alimwambia Finlayson na ujumbe wake kuwa gesi asilia hiyo inayoendelea kugunduliwa nchini ni rasilimali muhimu na lazima itumike kuwatoa watu katika umaskini na ibadilishe maisha.

“Maandalizi ya uchimbaji wake yasichukue muda mrefu ...miaka 10 hivi….. huu ni muda mrefu sana kwa sababu wananchi wetu wanahitaji kuona manufaa ya gesi asilia hiyo katika kipindi kifupi iwezekanavyo.

“Ni dhahiri kuwa nyie wabia wetu mtanufaika na gesi asilia hiyo kutokana na uwekezaji wenu lakini kimsingi tunataka gesi hii iwanufaishe watu wetu, iwatoe katika umaskini. Kama gesi hiyo inaweza kutuingizia pato la dola za Marekani bilioni moja kwa mwaka, ni dhahiri tunaweza kuibadilisha nchi hii ikawa mbingu,” alisema.

Rais Kikwete aliongeza kuwa jukumu kubwa la gesi asilia nyingi iliyogunduliwa na inayoendelea kugunduliwa maeneo mbalimbali nchini ni kuwatoa Watanzania katika umaskini.

Naye Finlayson alisema maendeleo ya maandalizi ya uchimbaji wa gesi asilia hiyo, itakuwa ni pamoja na kutoa nafasi za masomo kwa vijana wa Kitanzania kusomea utaalamu mbalimbali wa gesi hiyo asilia.