KLABU ya Yanga imeamua kumlipia nyota wake Mrisho Ngassa kiasi cha sh mil. 45.

KLABU ya Yanga imeamua kumlipia nyota wake Mrisho Ngassa kiasi cha sh mil. 45 alizotakiwa kuirejeshea Simba na Kamati ya Sheria na Hadhi za Wachezaji ya Shirikisho la Soka Tanzania (TFF), kwa sharti la kukipiga Jangwani kati ya miaka mitano au minne.

Kamati hiyo chini ya Mwenyekiti wake Alex Mgongolwa, imemtaka Ngasa arejeshe kiasi hicho ndani ya kipindi cha adhabu ya kukosa mechi tano za Ligi Kuu, kiasi cha sh mil. 30 alizopewa abaki hata baada ya kipindi chake cha mkopo akitokea Azam na fidia ya asilimia 50 ya kiasi cha fedha hizo.

Habari kutoka ndani ya klabu hiyo na kuthibitishwa na mmoja wa viongozi wake, wameamua kufanya hivyo kulinda kiwango cha mchezaji huyo ambaye kama watamwachia jambo hilo, kuna hatari ya kushindwa kucheza tena, hivyo kuwa pigo kwa mchezaji na timu ya Yanga.

Chanzo hicho kimedokeza kuwa jambo hilo wameshalijadili hata kwenye baadhi ya vikao vya Kamati ya Utendaji hivi karibuni kwamba klabu itabeba mzigo huo kwa sharti kuwa mchezaji huyo aliyewahi kucheza Kagera Sugar, Azam na Simba, atacheza Yanga kwa miaka mitano au minne.

Habari zinasema kama jambo hilo litapata baraka kutoka kwa viongozi wote, watalipa fedha hizo kuepuka kumpoteza Ngassa ambapo nyota huyo atazirejesha kwa kutumikia Jangwani kwa miaka miwili au mitatu zaidi ya mkataba wake wa miaka miwili uliomng’oa Simba.

“Bado hatujafikia muafaka ila suala hili tumelizungumza, tukikubaliana tutamlipia kisha yeye atatumikia fedha hizo kwa miaka hiyo ambayo tutasema sisi,” kilidokeza chanzo hicho na kuongeza kuwa ni jambo litakalohitaji ridhaa ya mchezaji mwenyewe kwani atashirikishwa.

Tanzania Daima ilipomtafuta Ngasa kwa njia ya simu jana kupata maoni yake, simu yake ya kiganjani iliita bila ya majibu huku Katibu Mkuu wa Klabu hiyo, Lawrance Mwalusako, akisema hana taarifa ya jambo hilo zaidi ya rufaa waliyowasilisha TFF kupinga adhabu hiyo.

CREDIT TANZANIA DAIMA