Wabunge wa Simba, Yanga kuumana Dar

WABUNGE wa Bunge la Jamhuri ya Muungano wa Tanzania wapenzi wa klabu kongwe za Simba na Yanga wanatarajiwa kuumana katika soka wakati wa Tamasha la Matumaini litakalorindima Uwanja wa Taifa jijini Dar es Salaam Julai 7, mwaka huu.

Tamasha hilo linatarajiwa kushirikisha mechi mbalimbali za soka na ndondi, ambapo mbali na mechi ya wabunge, Bongo Movie na Bongo Fleva wataumana huku Jitegemee wakioneshana kazi na Makongo, huku kwenye masumbwi Japhet Kaseba atazichapa na Francis Cheka, ambapo watatanguliwa na mapambano mengine kadhaa.

Akizungumza jijini Dar es Salaam jana, Meneja wa matukio wa Dar Live, Abdallah Mrisho, ambao ndiye waandaaji wa tamasha hilo, alisema lengo kubwa la tamasha hilo ni kuhimiza umuhimu wa kuendelea kuishi kwa pamoja, kuliombea taifa na kuchangia mfuko wa elimu.

Aidha, Mrisho alisema, katika tamasha hilo asilimia 20 ya mapato yatakwenda mfuko wa elimu kwa ajili ya kusaidia kununulia madawati na mambo mengine mbalimbali, ambapo wameamua hivyo baada ya kuombwa na wahusika.Aliongeza kuwa, tamasha hilo litapambwa na wasanii Naseeb Abdul ‘Diamond’ Joseph Muyanja ‘Chameleon’ kutoka Uganda na wengineo.

                      Habari na  Clescencia Tryphone wa Tanzania Daima