Meya Bukuba alikoroga

KATIKA mazingira ya kujihami baada ya kubanwa na Baraza la Madiwani akitakiwa kufafanua kiasi cha fedha kitakachotumika kutekeleza mradi wa ujenzi wa soko la kisasa mjini Bukoba, Meya wa Manispaa hiyo, Dk. Anatory Amani, amelazimika kuibua tuhuma mpya akidai anahujumiwa.

Meya huyo ambaye ni Diwani wa Kata ya Kagondo (CCM), alitumia kikao hicho cha Baraza la Madiwani kilichoketi juzi, kuibua tuhuma kwa baadhi ya wanachama na viongozi wa chama hicho mbele ya Waziri wa Mali Asili na Utalii, Balozi Khamis Kagasheki, ambaye pia ni mbunge wa Bukoba Mjini.

Kikao hicho kilimbana Meya Amani kikitaka kujua mradi huo utatekelezekaje kwa fedha kutoka vyanzo gani vya mapato na utagharimu shilingi ngapi hadi kukamilika.

Hatua hiyo ilikuja baada ya wajumbe kumlalamikia meya huyo kuwa amekuwa akifanya maauzi yote peke yake ikiwa ni pamoja na kusaini mikataba kadhaa ya kutekeleza miradi pasipo kuwashirikisha madiwani.

Hata hivyo, katika hatua ya kushangaza, Dk. Amani ambaye alionekana kujipanga mapema pamoja na wapambe wake, aligeuza kibao kwa ndugu wawili wa Balozi Kagasheki, ambao ni Abdul Kagasheki na Abubakar Kagasheki.

Meya Amani alidai kuwa wanachama hao wa CCM wanawarubuni baadhi ya wafanyabiashara mjini hapa kwa kuwashinikiza wajiorodheshe majina yao na kisha kumfungulia kesi ya madai ya sh bilioni 5 kama fidia ya kupisha ujenzi wa soko la kisasa utakaogharimu sh bilioni 12.

Katika kikako hicho ambacho Waziri Kagasheki akihudhuria kwa mara ya kwanza tangu kumalizika kwa uchaguzi mkuu mwaka 2010, Meya Amani alisema kuwa kuma kundi dogo wana-CCM na baadhi ya viongozi kama Abdul, Abubakar na Mauled Kambuga, wanachochea ili ujenzi huo usifanyike.

Alidai kuwa anatolewa kafara kwa kushtakiwa yeye binafsi na si kama meya, akitakiwa kulipa sh bilioni 5 kama fidia kwa wafanyabiashara wa soko kuu kwa ajili ya kutekeleza miradi ya maendeleo inayosimamiwa na chama chake na kuzingatia maazimio ya baraza la manispaa hiyo.

Dk. Amani alimweleza Waziri Kagasheki kuwa baraza hilo lina madiwani wanaotokana na vyama vitatu vya CCM, CHADEMA na CUF lakini akabainisha kuwa madiwani wa upinzani hawapingi mambo ya maendeleo bali wanaunga mkono na kushirikiana na manispaa.

“Ninashtakiwa kuwa mimi si raia wa Tanzania bali wa Uganda, haya yote ni kunitafuta na kukwamisha miradi ya maendeleo kwa mji wa Bukoba,” alisema.

Akizungumza  jana jioni kutoka mjini Bukoba, Waziri Kagasheki alisema yeye kama mbunge wa Bukoba amesikitishwa sana na kitendo cha meya kushindwa kujibu hoja na badala yake kuibua tuhuma zisizo za msingi.

Kagasheki alisema kuwa miradi mingi jimboni humo inalalamikiwa na wananchi kutokana na meya kutowashirikisha na kwamba hata baraza la madiwani lilitaka awaeleze fedha za ujenzi wa soko zinapatikanaje.

“Inaonekana yako mambo mengi yanafanyika wananchi hawaelewi, sasa tunapohoji fedha hizi za walipa kodi ni kwa nini tuingize mambo ambayo ni tofauti na hoje lengwa. Jumamosi nitafanya mkutano na wananchi nitawaeleza kila kitu,” alisema Waziri Kagasheki.

Naye Mwenyekiti wa CCM Wilaya ya Bukoba ambaye pia ni Diwani wa Kata ya Kashai, Yussuph Ngaiza, alitishia kumchukulia meya huyo hatua kwa kukidhalilisha chama hadharani mbele ya wapinzani.

Akijibu tuhuma za meya kwa niaba ya wenzake, Abdul Kagasheki, alisema malalamiko hayo hayana ukweli wowote dhidi yao.

Kagasheki ambaye pia ni Mwenyekiti wa Wazazi Mkoa wa Kagera, alisema kuwa yeye pamoja na Maulid Kambuga ambaye ni Diwani wa Kata Kagya na Abubakar Kagasheki, wamemfungulia kesi ya kashfa meya kutokana na kuwatangaza kwamba wanataka kumuua.

Alifafanua kuwa hawahusiki na kesi ya wafanyabiashara wa sokoni isipokuwa wakili anayewatetea wafanyabiashara hao ndiye anayewatetea pia wao.