Waganga wa kienyeji kortini kwa utapeli.

WAGANGA wawili wa kienyeji na washirika wao wamefikishwa katika Mahakama ya Wilaya ya Bunda kwa tuhuma za kujipatia fedha kwa njia ya udanganyifu, baada ya kumtapeli mwalimu mmoja sh 620,000 kwa madai kwamba wazizalishe ili ziwe nyingi zaidi.

Waliofikishwa katika mahakama hiyo mwishoni mwa wiki mbele ya Hakimu Safina Simfukwe ni 

Hussein Shaban na Revocatus Malima (30) ambao ni waganga wa kienyeji.

Watuhumiwa wengine ni Nyamanga Chacha Mnanka (31), mkazi wa kijiji cha Sabasaba wilaya ya Butiama na Magungu Fidelis (27), mkazi wa mtaa wa Saranga mjini Bunda ambao wametajwa kuwa ni washirika wa waganga hao.

Mwendesha Mashtaka, Masoud Mohamed, alidai washtakiwa hao walitenda kosa hilo Novemba 29, mwaka huu, majira ya mchana katika eneo la Stendi Mpya mjini Bunda kwa kumtapeli mwalimu Margreth Alphonce wa Shule ya Msingi Namhura.

Alidai kuwa baada ya kufanya utapeli huo walipanda ndani ya teksi na mwalimu huyo hadi katika baa moja iliyoko mjini Bunda na kuanza kunywa vinywaji, huku wakimwambia asubiri kidogo pesa zake ziweze kuzalishwa.

Alieleza kuwa watu hao walikamatwa na polisi baada ya raia wema kutoa taarifa, wakati wakijiandaa kumtoroka mwalimu huyo.

Washtakiwa wote walikana tuhuma hizo na wamepelekwa mahabusu baada ya kushindwa masharti ya dhamana. Kesi itatajwa Desemba 14, mwaka huu.Habari na Ahmed Makongo, Bunda