Waliopora wasindikiza maiti wanaswa.

JESHI la Polisi mkoani Singida, limefanikiwa kuwakamata watu 25 wanaotuhumiwa kuwa majambazi wakiwa na vitu vilivyoporwa kwenye gari la wafiwa lililokuwa limebeba maiti ya mwanafunzi wa Chuo Kikuu cha Kilimo cha Sokoine (SUA) kwenda Tarime mkoani Mara.

Kamanda wa Polisi Mkoa wa Singida (ACP), Linus Sinzumwa, alisema kuwa watuhumiwa hao wamekamatwa jana kufuatia msako mkali ulioendeshwa na askari polisi kwa kushirikiana na wananchi.

Alisema kuwa watuhumiwa hao wamekutwa na vitu mbalimbali walivyopora usiku wa kuamkia Jumamosi ya wiki iliyopita katika eneo la Kindai Manispaa ya Singida.

Sinzumwa alitaja mali zilizokamatwa kuwa ni pamoja na nguo za wasindikizaji, kadi mbili za ATM za CRDB, chaja mbili za simu, vitambulisho vya wafanyakazi hao, kamera, Laptop, simu, pamoja na sh 20,500 zizookotwa eneo la tukio.

Aliongeza kuwa pia watuhumiwa hao walikutwa na rungu nne na fimbo kadhaa vilivyotumika katika kuwapiga wafanyakazi hao wa SUA kabla ya kuwapora fedha sh milioni 10, simu za mkononi na mali zingine.

Kamanda alifafanua kuwa polisi bado wanaendelea kuwahoji watuhumiwa hao ili kubaini vinara wa tukio hilo kwani baadhi yao walikuwa wakijitapa kwenye vijiwe vya pombe kuwa na fedha za matumizi , huku wengine wakidai wanakula fedha za jeneza.

“Kwa sasa majina hatuwezi kuyataja maana bado tunaendelea na upelelezi na kuwasaka wengine na baadaye tutafanya upembuzi ili kuwabaini wale wahusika lakini pia nawaomba hawa wenzetu wa Tanroads kutoa mawe makubwa ambayo yapo pembezoni mwa barabara, ambayo wahalifu wanayatumia kuteka magari,” alisema.

Mwishoni mwa wiki iliyopita kundi la majambazi zaidi ya 10 yaliteka gari la SUA lililokuwa limebeba mwili wa marehemu mwanafunzi wa chuo na kupora fedha, simu za mikononi na vitu vingine kisha kuvunja jeneza na kumpekua marehemu.

Gari hilo aina ya Land Cruiser hard Top lenye namba za usajili SU 37012 lilikuwa likitotokea Morogoro kupeleka msiba wa mwanafunzi wa mwaka wa tatu Munchari Lyoba aliyefariki chuoni hapo, ambaye ni mkazi wa Tarime, mkoani Mara.