Daktari Yanga ‘apigwa chini’

UONGOZI wa mbingwa wa Kombe la Kagame, Yanga, umemtema daktari wake, Juma Sufiani,kwa kushindwa kuambatana na timu nchini Uturuki.

Yanga iliondoka nchini Desemba 30, kwenda Uturuki kwa kambi ya wiki mbili na bila kutarajiwa uongozi ulishangaa Dk. Sufiani kushindwa kutokea uwanja wa ndege wa kimataifa Julius Nyerere (JNIA).

Awali, uongozi kumtaka daktari huyo kuandika barua ya kujieleza, sababu zilizomfanya kutotokea siku timu inaondoka.

Akizungumza na mwandishi wa habari hizi kwa sharti la kutotajwa jina kwa sasa, mmoja wa viongozi wa klabu hiyo alisema kwa kitendo hicho ambacho ni kinyume cha taaluma, uongozi unatarajia kumnyang’ang’anya kibarua hicho na kumpa anayetambua wajibu na kazi yake.

“Kitendo cha timu kuondoka bila ya daktari, hata sisi viongozi kilitukera sana na ndiyo maana tukamtaka ajieleze kabla uongozi hamjamchukulia hatua zaidi,” kilisema chanzo hicho cha uhakika kutoka ndani ya klabu hiyo kongwe hapa nchini.

Aidha, kiongozi huyo alisema licha ya Dk. Sufiani kujitetea kwa maandishi, lakini uongozi haujaridhika, hivyo atavuliwa majukumu hayo.

Ilielezwa kuwa, kitendo cha Dk. Sufiani kushindwa kuondoka na timu, kulisababisha kadhia kwa wachezaji hususan Frank Domayo aliyeumwa malaria na Hamis Kiiza kifundo cha mguu, ambapo ilibidi kuomba msaada wa madaktari wa Hoteli ya Fame Residence, ambao waliwatibu na kupona.

Sufiani amefungashiwa virago ikiwa ni takriban miezi mitano tangu Ofisa Habari wa klabu hiyo, Louis Sendeu na Katibu Mkuu, Selestine Mwesigwa ‘Koffi Anan’ nao kupewa mkono wa kwa heri.

Awali, Dk. Sufiani alipoulizwa na mwandishi wa habari hizi kwanini hakuambatana na timu, alidai uongozi wa Yanga unazijua na tayari ameishawafahamisha.

Lakini juhudi za kumsaka jana ili athibitishe kama amepata barua ya kuondolewa katika kibarua chake hazikuzaa matunda kwani hakuweza kupatikana kupitia simu yake ya kiganjani.