TRA wamesema kuanzia Aprili mosi mwaka huu watazifuta leseni zote za zamani na madereva watapaswa kuomba upya.

JESHI la Polisi nchini kwa kushirikiana na Mamlaka ya Mapato Tanzania (TRA) wamesema kuanzia Aprili mosi mwaka huu watazifuta leseni zote za zamani na madereva watapaswa kuomba upya.

Zoezi la kubadili leseni za kuendesha magari ya aina zote litakamilika Machi 31, mwaka huu.

Akizungumza jana jijini Dar es Salaam jana, Ofisa Mnadhimu Kikosi cha Usalama Barabarani, Johansen Kahatano, alisema hadi kufikia Desemba 31, mwaka jana, leseni 616,349 ndizo zilizokuwa zimetolewa nchi nzima.

Alisema takwimu hizo za leseni haziendani na idadi ya vyombo vya moto vilivyosajiliwa na 

TRA ambapo hadi kufikia Desemba mwaka jana vilifikia 1,164,574 hali inayoonesha kuwepo na madereva wasiokuwa na leseni halali.

“Kazi ya utoaji leseni mpya ilianza Oktoba mosi, 2010 na itakamilika Machi 31, mwaka huu na atakayeshindwa kubadili ya zamani atatakiwa kuomba upya na kuingia katika mafunzo ya ‘learners’ na atakayeendesha gari bila leseni, atakamatwa na kufikishwa mahakamani,” alisema.

Kahatano alisema lengo la kuanzishwa mfumo huo ni kuinua kiwango cha udereva kupitia mafunzo ya lazima hususan madereva wa mabasi yanayobeba abiria.

Pia alisema kuwa itasaidia kuondoa tatizo la kughushi na kudhibiti mienendo ya madereva kupitia kumbukumbu za makosa zitakazotunzwa kwenye leseni ya dereva.

Kahatano alieleza kuwa zoezi la kukagua leseni litafanyika nchi nzima kuanzia Aprili mosi mwaka huu na kuwaagiza madereva kutembea na leseni zao ili kuepuka usumbufu.
                                   Habari na Happiness Mnale-Tanzania Daima.