Malecela aunga mkono CHADEMA

WAKATI Bunge likitaja wabunge wa Chama cha Demokrasia na Maendeleo (CHADEMA) kama vinara wa vurugu zilizosababisha kikao cha Bunge kuvunjika wiki iliyopita, mkongwe wa siasa nchini, Samuel Malecela, ameunga mkono msimamo wa wabunge hao na kukiri kwamba walikuwa na haki ya kupiga kelele.

Waziri mstaafu,John Malecela

Malecela ambaye amepata kuwa Waziri Mkuu na Makamu Mwenyekiti wa CCM taifa, alisema ni uonevu kwa Bunge kutaka kuwachukulia hatua kwa madai ya kufanya vurugu.

Akitoa maoni yake kuhusiana na mwenendo wa siasa na uendeshaji wa shughuli za Bunge akiwa nyumbani kwake mjini hapa, Malecela alisema ni haki ya wapinzani kutoa hoja zao na kupiga kelele bungeni kutokana na sheria ya kuwapo kwa vyama vingi.

“Wakati wa uanzishwaji wa vyama vingi, nilikuwa katika mchakato huo na tulijua kuwa hayo ni lazima yawepo, kwa kufanya hivyo inaonesha wazi kuwa ni wakati wa vyama vingi na ndiyo maana wakati mwingine wanafanya mambo ambayo yanalenga kuishinikiza serikali kufanya mambo mbalimbali.

“Ikumbukwe kuwa maana ya kuwapo kwa vyama vingi ni tofauti na kuwapo kwa chama kimoja, kama kingekuwapo chama kimoja ingekuwa sawa na kuchezea mpira chini ya meza, kutokana na kuwapo kwa wabunge wa vyama vingi ndiyo maana tunaona hali hiyo inayotafsiriwa kama fujo,” alisema.

Juzi Bunge liliwataja Mbunge John Mnyika (Ubungo), Joshua Nasari (Arumeru Mashariki), Tundu Lissu (Singida Mashariki) na Mbunge wa Viti Maalumu, Paulina Gekul kwamba ndio vinara wa vurugu bungeni, lakini likashindwa kuwachukulia hatua.

Siri ya ripoti yafichuka

Wakati Malecela akitoa kauli hiyo, siri ya kile kilichotokea wakati wa kikao cha kamati ya kuchunguza vurugu hizo imefichuka.

Habari kutoka ndani ya Kamati ya Maadili, Kinga na Madaraka ya Bunge, ambayo kabla ya kuvunjwa ilikuwa inaongozwa na Brigedia Mstaafu, Hassan Ngwilizi, zilisema kuwa kulikuwa na mvutano mkubwa katika kushughulikia suala hilo na matokeo yaliyotangazwa bungeni yana utata mkubwa.

Vyanzo vyetu vya habari vilisema kuwa mvutano huo ulitokana na namna ambavyo kamati hiyo ilivyofanya kazi ya kubaini wabunge waliohusika kwenye vurugu hizo.

”Kwanza walichukua mikanda iliyorekodiwa na TBC, lakini siku hiyo ilipiga picha za meza ya Spika tu. Picha za kamera za CCTV, zilionesha wabunge wakiwasha vipaza sauti, lakini sauti hazisikiki.

“Hansard ilionesha majina ya wabunge hao wa CHADEMA na cha ajabu hakuna hata mbunge mmoja wa CCM,” kilisema chanzo chetu cha habari.

Kibaya zaidi kamati hiyo haikuwaita wabunge hao kujitetea, lakini ikaamua kuleta majina yao bungeni na kushindwa kuwachukulia hatua.

Februari 4, mwaka huu, Bunge la Kumi likiwa katika kikao chake cha tano majira ya jioni palitokea vurugu kubwa ndani ya Bunge, hali iliyosababisha Naibu Spika, Job Ndugai, kuliahirisha Bunge kwa siku hiyo, zikiwa ni dakika chache tangu lilipoanza.

Kuahirishwa huko kulitokana na vitendo vya wabunge kupiga kelele bungeni huku wakipinga kuwa hoja ya Mbunge wa Ubungo John Mnyika (CHADEMA), ilitaka kuondolewa kwa ubabe.

Wabunge vinara

Miongoni mwa majina ambayo yalitajwa na Ngwilizi kuwa ni ndio vinara wa vurugu hizo ni wabunge wa CHADEMA, John Mnyika (Ubungo), Joshua Nasari (Arumeru Mashariki), Tundu Lissu (Singida Mashariki) na Mbunge wa Viti Maalumu, Paulina Gekul.

Mnyika: Kamati imebabaisha

Akizungumzia uamuzi wa kamati hiyo, John Mnyika, alisema imetoa taarifa ya uchunguzi wa upande mmoja bila kuchunguza na kusikiliza wahusika mbalimbali na kimsingi haijawahoji.

Mnyika alisema kilichofanywa na kamati hiyo ni ubabaishaji, kwa vile kamati ilipewa hadidu rejea tatu; ya kwanza ikiwa ni chanzo cha vurugu, lakini yenyewe ikadai ni tafsiri ya muda uliotumiwa na waziri, jambo ambalo alisema ni uongo.

“ Chanzo ni ubishani kuhusu ukiukwaji wa kanuni uliofanywa na naibu spika wa kumruhusu waziri kwa kutumia kanuni ya 57, 1, c, kuwasilisha mabadiliko ya hoja ya kuingiza maneno ya kuondoa hoja ya msingi, uamuzi ambao ni kinyume cha kanuni ya 57,4 ambayo inakataza kufanya mabadiliko yanayopingana moja kwa moja na ile ya msingi.

“Na kanuni nyingine ya 58,5 inayosema mwenye mamlaka ya kuondoa hoja ni mtoa hoja pekee kwa azimio la Bunge. Maana hata mtoa hoja akishawasilisha hana idhini ya kuondoa bila ridhaa ya Bunge. Nilipowasilisha hoja asubuhi, hata mimi mwenyewe ningetaka kuondoa ilibidi niombe idhini ya Bunge. Hiki ndicho kiini kikuu cha ubishani uliozuka na kimsingi tulitaka kanuni zifuatwe,” alisema Mnyika.

                                                 CHANZO TANZANIA DAIMA