Diwani kortini akidaiwa kuua.

DIWANI wa Mabira, Christian Songambele (58) CCM, amefikishwa katika Mahakama ya Wilaya ya Karagwe akikabiliwa na makosa mawili ya mauaji.

Mbele ya Mlinzi wa Amani, Jane Kalegea, Mwendesha Mashitaka wa Polisi, Juma Lipwata, alidai kuwa mshitakiwa alitenda kosa hilo Machi 13 mwaka huu, majira ya saa 10 jioni katika Kijiji cha Omukagendo.

Mwendesha Mashitaka, alidai kuwa katika kutenda kosa hilo, mshitakiwa alishirikiana na Datius Dominick (45) na Namara Joseph (43) wote wakazi wa kijiji hicho.

Mshitakiwa hakutakiwa kujibu lolote kwa kuwa mahakama hiyo haina uwezo wa kusikiliza kesi za mauaji.

Mshitakiwa amepelekwa rumande na kuunganishwa na wenzake wawili ambao tayari walikwisha kusomewa mashitaka. Kesi hiyo itatajwa Aprili 18, mwaka huu.