Shule 10 Ruangwa hazina vyoo

SHULE 10 wilayani Ruangwa, Lindi, hazina vyoo baada ya kubomoka kutokana na mvua inayoendelea kunyesha.

Mkurugenzi Mtendaji wa Halmashauri ya Wilaya ya Ruangwa, Rueben Mfune, alibainisha hayo juzi wakati akisoma taarifa katika kikao cha Baraza la Madiwani cha robo ya tatu kwa mwaka wa fedha 2012/2013 kilichofanyika katika Soko la Tasaf wilayani hapa.

Alizitaja shule hizo za msingi kuwa ni Mtakuja, Mbecha, Namihegu, Mpumbe, Mtawile, Nanjaru, Chienjere, Ruangwa, Dodoma na Mandawa, ambazo zipo katika Halmashauri ya Wilaya ya Ruangwa.

Mfune alisema kutokana na maafa hayo mpaka sasa hatua zilizochukuliwa ni kuchimba vyoo vya muda katika maeneo husika kwa kushirikisha wananchi.

“Hatua tunayolenga kuchukua sasa ni kununua vifaa vya ujenzi na  tathmini ikikamilika itapelekwa kwenye kamati ya fedha na uongozi kabla ya utekelezaji,” alisema Mfune.

Mfune alisema kuwa utekelezaji wa kazi hiyo utakuwa kati ya Juni mwaka huu na watatumia fedha zilizotengwa kuwezesha miradi ngazi za chini kutatua jambo hilo la dharura.

Pamoja na mambo mengine yaliyojili ndani ya kikao hicho, madiwani hao walichachamalia malipo ya korosho na kuitaka serikali kuwalipa wananchi malipo yao ya pili ya korosho.

“Wananchi wamekuwa wakitunyoshea vidole tunapokwenda vijijini katika shughuli zetu za kikazi na tumekuwa tukiwaambia hali halisi ya ucheleweshaji wa malipo yao, lakini wao wamekuwa hawatuelewi, wao wanataka hela zao.

“Kwa kweli tunahatarisha maisha yetu, kwani wamekuwa wakitutishia maisha na sisi kama binadamu lazima tuogope yasije yakatokea kama yaliyotokea kwa wenzetu wabunge wa Mkoa wa Mtwara kuchomewa nyumba zao moto,” walisema madiwani hao.

Diwani wa Matambalale, Omary Liwikila (CUF), alitaka mfumo wa stakabadhi ghalani uondolewe, kwani unaleta usumbufu na ubabaishaji kwa wananchi.

“Huu mfumo kwa upande wangu naomba uondolewe, kwani unaleta usumbufu kwa wananchi. Wananchi wanalima kwa shida na wakati wa kuneemeka katika kuuza mazao yao ya korosho wapate shida tena ya kudai dai malipo?” alihoji Liwikila.

Mkurugenzi wa Halmashauri ya Wilaya ya Ruangwa, Mfune, akijibu hoja hiyo, alisema hawezi kutoa tamko juu ya suala hilo, hivyo wanasubiri serikali yenyewe itakapoamua kuondoa mfumo huo wa stakabadhi ghalani.